اللحيــ ــــــــــــــــــة ( من غير زعل )

السلام عليكم ورحمة الله وبركاته ...


إسمه ايهاب .. عمره 22 سنه سقط كذا مره في الكليه ومشهور

شاب غيرعادي كان زي ما الناس بتقول شاب روش مقطع السمكة وديلها وكل حاجه فيها .. وكان مشهور في الكلية بقلة أدبه .. ومشيه ( الوحش ) مع البنات .. وبيشرب سجاير ومخدرات وكل حاجه .. وعلي طول خناقات ومشاكل في الجامعه ..
بعد مدة بدء يظهر عليه شيء غريب ألا وهو بدء لبسه يتظبط عن الاول .. تحس لما تشوفه انه اتغير فعلاً بدءت لحيته تطلع .. وظهرت عليه علاما ت التشبه بالنبي صلي الله عليه وسلم .. وبدء تحس انه فعلا اخ وتحس ان حياته كلها اتغيرت بعد ما أطلق لحيته ..

وده طبعاً كان غريب جداً جداً ان واحد زي ده يلتزم وبالسرعه دي ..
لكن الاغرب انك تعرف انه اسمه ايهاب جورج وان اخوه اسمه مايكل ...

بالظبط كده هو بالفعل نصراني .. وطبعاً هيجي في بالك بعد ما تشوف لحيته انه اسلم ..

ولكن الموضوع فخ كبير وحركه دنيئه تعلم مدى قذارتها عندما تعلم ماضي هذا الشاب وماذا كان يفعل بعد اطلاقه للحيه حتى يسئ للملتحيين .. ازداد في قلة ادبه وبقا يعاكس البنات في الكليه وهو بلحيته .. وبقا يمشي بعربيه مشغل اقذر الاغاني ... ويبقي قاعد . بيشرب كل ما تتوقعه في عربيته .. ( اقسم بالله العظيم هذا الكلام حصل وانا رأيته بعيني في الكلية ( مودرن اكاديمي ) والله علي ما اقول شهيد )

قد يقول البعض ممكن متكنش لحيه ممكن يكون سابها مثلاً مضايق ابوه خبطه قطر .. فمضايق فساب دقنه .. لاء يا اخوه لحيته كانت من طويله احنا الملتزمين في الكليه افتكرنا انه اخ بجد . كانت شعرة لحيته تصل لطول السبابة لدرجه اني قبل ما اعرف انه نصراني كنت بمشي وابتسم ليه واسلم عليه ..

فالوضع دلوقتي .. انه انسان ملتحي يشرب السجاير والمخدرات يعاكس البنات ويشغل الاغاني ...

وقد تم اختيار هذا الشخص
1- اسمه الاول ( ايهاب ) لا يدل علي انه نصراني
2- جرأته المعروفه انه يقدر يتحمل ما يعمله من كلام يسم البدن وهو إي الكلام له متعه في انه يسمع مش عيب شيخ وبتعمل كده .. ده كلام يسم البدن لينا ويمتع أذنه هذا الانسان الوقح ..
3- خبرته السابقه في قلة الادب والمعاصي . وعلاقته بالعاهرات في الجامعه .. يعني واحد جاهز ومعاه علاقاته ..

-------------------------

انتهى كلامي عن ايهاب ..

ونبدء اليوم في موضوعنا ... الذي له علاقه بإيهاب وهنرجع نعلق علي ايهاب

كلامي النهارده مش عن الدعوة ولا عن غير الملتزمين ... كلامي النهارده من نوع خاص ... هوجه كلامي لاخي وحبيبي وانسان حبه بالنسبه لي عبادة وأجر ... وانه يزعل مني اكثر من ثلاث ايام .. يوقف لي اجر عملي ..

انسان اذا ابتسمت في وجهه أخذت اجر ..

انسان .. طيب .. ومحترم .. ونفسه بالفعل يخدم الدين ..

انسان عرف مين عدوه ...

انسان نفسه يبعد عن الشهوات وعن الشبهات ..

انسان فعلاً بيبحث عن الحق وعايز يعرف ايه هو الطريق الصحيح في الحياه ( goodwayinlife

لكنه بالرغم من انه طيب .. ومحترم وبيحب الدين وبيكره اي شيء يؤثر علي الدين بالسلب وفوق ده وده عنده همه فلو طلبت منه ان تأخذ منه كل ماله ما تأخر ..

لكن مشكلة أخي الحبيب ده .. انه تااه في وسط زحام الافكار والمناهج .. تاااه في وسط فلان قال وفلان قال ...

تاه في وسط اسماء جماعات واسماء حركات .. وهو دلوقتي مش عارف الحق فين مش عارف يمشي مع دول ولا يمشي مع دول ... هو شايف ان الناس دي بتعمل حاجات كويسه لكن عندهم بعض الاخطاء ( من وجهة نظر ناس تانيه ) .. وعارف ان الناس الفلانين كويسين بردو وبيحبوا الدين وعندهم شوية اخطاء من وجهة نظر الناس التانيه ( بردو .. ومش عارف هل ينفع اخد من دول الصح ومن دول الصح واكون اعمالي كلها صح ؟؟

طيب هو الصح ده انا الي احدده ؟ ولا مين يحدده .. ما انا ممكن اشوف حاجه اقول عليها حلوه و100 يقولوا وحشه .. مع اني مقتنع انها حلوه ..

هل الجماعه الاكتر هي الصح ؟؟

طيب هل انا عشان احب اعمل خير .. ايه يمنعني طالما انا نيتي كويسه ؟؟

طيب انسان ضايع ومش هعرف اوصله غير لو اتنازلت عن بعض الاشياء في شخصيتي وفي دعوتي وفي ديني .. هل اتنازل ؟ ولا اسيبه يضيع ؟

ولو اتنازلت لمصلحة الدعوه ؟ هل ده صح ... والملك الي بيكتب السيئات هيعرف ان ده لمصلحة الدعوة فإي شيء انا بعمله غلط لمصلحة الدعوة ملك السيئات مش يكتبه !!!

طيب لو انا متنازلتش والانسان الي بدعوه ده ضاع هل انا هتحاسب عليه ؟

طيب ايه اهم شيء في الدين ادعوا ليه .. هل الغرض من ان ربنا يخلقنا اننا يُمكن لينا في الارض ؟ ولا اننا نعبده ؟


كل دي اسئله بتدور في ذهن اخي وحبيبي ... كلها اسئله مهمه .. ممكن يختلف عليها ناس كتير ..

وانا كلامي مش عن المنهج .. النهارده .

انا كلامي عن شيء أخر .. تماما ً


طيب انا مش هدخل معاك في مين صح ومين غلط .. الجماعه البيضا صح ولا الجماعه الحمرا صح وكاننا في ماتش الاتحاد والسكة الحديد .. :)

هقولك علي شيء نتفق عليه ... كل جماعه من الجماعات .. بتقول علي نفسها انها بتمشي علي الكتاب والسنه ... ولو قلت لاي واحد منهجك ايه يقولك الكتاب والسنة .

ولو روحت لاي واحد ( مسلم عاقل ) وقلت ليه ايه رايك نمشي علي القران والسنة ؟ يرحب جداً جداً وميقدرش يقول لاء حته وان كانت افعاله مش علي الكتاب والسنة ....

فانا عايز اقول من كل الي فات ده .. ان الي عايز يسمي نفسه تبع جماعه يسمي نفسه محدش هيضربه علي ايده ... يعني فلان قالي انا بقيت مع الجماعه الصح .. هل مجرد اني بقيت مع الجماعه الصح يبقي انا كده خلاص هدخل الجنه ؟ ولا الجنه دي بدخلها بعملي سواء حلال او حرام بعد رحمة ربنا ؟ يبقي مش مهما تقول بلسانك انا مع مين .. كلنا هنبعث يوم القيامة فرادى لا حبي للداعيه الفلاني يشفعلي ولا حبي للعالم الفلاني يشفعلي .. انا ممكن اكون بدافع عن انسان عنده اخطاء .. وماشي وراه مع علمي بغلطه .. وعشان انا شايف انه ناجح وكل الناس بتحبه يبقي هو ماشي صح .. يبقي انا هقلده في الصح بتاعه والغلط بتاعه .. طيب علي فكره .. ممكن هذا الانسان الي انا بقلده قبل ما يموت يتوب عن اي خطء ليه وربنا يتقبل توبته .. ويدخله الجنه .. لكن انت يا اخي هل معاك ضمان انك مهما كان ليك من اخطاء هتتغفر ليك عشان بتعمل حسنات تانيه ؟ يبقي وصلنا نقطه انا معاهم ومع فلان وعلان ... دي ملهاش لازمه لان في الاخر كل واحد هيتحاسب علي افعاله واقواله ومعتقده .. المهم ان افعاله يوم القيامه هتقاس علي الكتاب والسنة .. حتى وإن ادعى .. انه ملتزم بالكتاب والسنه لكن يوم القيامه تظهر الحقائق .. هل كان ملتزم ظاهراً فقط ؟

ولا قلباً وقالباً ؟؟ هل كان يهمش الظاهر بحجة ان الباطن أهم ؟؟ كل ده هيحاسب عنه المرء يوم القيامه فشقي او سعيد .. حتى وان كانت مثقال ذرة سيحاسب عنها ..

السلام عليكم ورحمة الله وبركاته
عندي تعقيب صغير على هذا الموضوع
ليس اي رجل ملتحي يكون ملتزم في دينه قد يكون ملتحي وغير ملتزم وشاب اخر يكون غير ملتحي وملتزم في دينه
اللحية هي سنة عن رسولنا الكريم وكما قال شيخنا "محمد حسين يعقوب "في احدى حلقات فضفضة على قناة الناس ان الغرض من اللحية التشبة بالرسول كما ان اللحية تفرض على الرجل المؤمن المسلم أن يكون ملتزم قي دينه يمشي على النهج القراني وسنة رسولنا الكريم صلى اللله عليه وسلم
بورك الله فيكي اختي الحبيبية "حفيدة "وجزاكي الله خيرا ونقل جميييل
احبك في الله